Ыам ыйын 16-17 күнүгэр Өлүөнэтээҕи государственнай историко-архитектурнай "Доҕордоһуу" заповедник түмэл "Ночь в музее" Бүтүн Россиятааҕы культурнай-сырдатар акциянан Кыайыы 80 сылыгар, Норуоттар икки ардыларынааҕы музейдар күннэригэр анаан улуус оскуолаларын оҕолоругар III-с төгүлүн "Omolloon Saas" квест-оонньуу тэрилиннэ.
Улууспут оскуолаларыттан уопсайа 10 хамаанда кыттыыны ылла. Ол курдук, Суотту орто оскуолата икки хамаандата, Хоноҕор сүрүн оскуолата икки хамаанда, Уус Алданааҕы техникум, Мүрү 1 ньүөмэрдээх орто оскуолата икки хамаанда, Майаҕас орто оскуолата, Уһун Күөл орто оскуолата уонна Сыырдаах орто оскуолата биир хамаанда, салайааччы история учуутала Ольга Сергеевна Местникова. Экскурсия кэннэ, хамаандалар бэйэлэрин билиһиннэрэн: үҥкүү, хоһоон, гитаранан ырыа толордулар. Ол кэннэ ыстаансыйанан хамаандалар икки ардыларыгар күрэх ыытылынна. Ол курдук, пазл таҥыы, таабырын таайыы, өс хоһооно, ыйытыктарга эппиэттээһин.
Квест-оонньуу оруобуна бэлиэ күҥҥэ ананан ыытыллыбыта биһирэбиллээх, сахабыт сирин баай историятыттан элбэҕи иҥэриннилэр. Сорох оҕолор аан бастакытын бу түмэлгэ сырыттылар, түмэл үлэтин туһунан сиһилии билистилэр.
Оонньуу ис хоһоонун тута өйдөөн олус үчүгэйдик киирэн тураннар кытыннылар, сэргэхсийдилэр, биһирээтилэр. Эһиил эмиэ өссө үчүгэйдик бэлэмнэнэн кэлиэх буолан тарҕастылар. Хас биирдии кыттыбыт хамаандаҕа “Туоһу сурук”, кыайыылаах хамаандаҕа минньигэс бириис туттарылынна.
Түгэнинэн түбэһиннэрэн "Доҕордоһуу" түмэл кэлэктиибигэр, чуолаан салайааччы Айым Степанович Охлопковка, оҕолорбутугар дириҥ суолталаах тэрээһини тэрийбиккитигэр махтанабыт!